INTERVIEW mit Plattdüütskbüro

"Troo di wat un proot Platt"

Vör 30 Jahr wurr bi de Oostfreeske Landskupp dat Plattdüütskbüro heel offiziell openmaakt. Toeerst hett de een of anner daar over smüüstert, man nu is de Inrichten al lang to en fasten Institution worden. Vanwegen dat runn Jubiläum hett Werner Jürgens mit de Baas Grietje Kammler un mit Anita Willers, de al van Anfang an d’rbi is, proot. Daarto komen noch Elke Brückmann un Ilse Gerdes, denn is dat Plattdüütskbüro upstünds kumpleet besett. 

 

Fraag: Froo Willers, Se hebben nipp un nau mitkregen, wo dat mit dat Plattdüütskbüro anfangen is. Weren Plattdüütskkenntnissen dotieds en Vörutsetten för de Stee? 

Anita Willers: Dat weet ik heel neet mehr so genau. Bewurven hebb mi eerst um en ABM-Stee as Bürokoopfroo. Laterhen is daar en fasten Stee van worden. Dat ik Plattdüütsk proten kunn, hett mi seker neet schaadt. Plattdüütsk schrieven kunn ik to Anfang neet. Dat muss ik eerst lehren. 

 

Fraag: Froo Kammler, Se sünd siet 2014 d’rbi un hebben de langjahrig Baas Cornelia Nath oflööst. 

Grietje Kammler: Se heet overhoopt eerst de nödig Grundlagen för uns Arbeid van vandaag leggt. Cornelia Nath weer neet blot de Gründerin un de Motor van dat Plattdüütskbüro. Se hett vör all politisk wat beweegt un sük in en Bült Gremien bit hen na de Europäisk Union insett. Daarför mutten wi hör en heel groot Dank seggen. Intüsken gifft dat en Charta, de Regionaalspraken as Plattdüütsk besünners schuult un vöranhelpt. Düütskland hett disse Charta 1999 unnerschreven. Sükse Grundlagen, de in en Gesett fastleggt sünd, geev dat vördeem neet. Se maken uns Arbeid vööl lichter, umdat wi heel anner Vörutsettens hebben, wenn wi to ‘n Bispill mit Bildungsinrichtens of Verwaltens tosamenarbeiden willen.

Dat kumpleet Interview steiht in d' Oostfreeske Kureer van 19. Februar 2022